الخميس 21 أبريل 2022
فرحة خريج الجامعة قصيرة كلش، ما يمديه يفرح إلا بعدها يحزن، ويجيه اكتئاب بعد!
وبالتحديد لما يبدأ يبحث عن فرصة عمل، ويشوف إن من ضمن شروط القبول في الوظيفة، الخبرة اللي ما تقل عن 5 سنوات!
انزين يعني من وين راح يحصل على هالخبرة إذا ما عطيتونه كأصحاب عمل فرصة يبدأ فيها الشغل ويكتسب الخبرة؟
لا خلاف، بعض الوظائف تحتاج موظفين عندهم خبرة، لكن مو معناته كل الأشغال والوظايف تحتاج خبرة مسبقة
في وظايف حتى ما تحتاج فيها شهادة جامعية، ومع ذلك يطلبون فيها الخبرة، وظايف يمكن من خلال تدريب بسيط على آلية العمل، يعرف الموظف شلون يكمل الشغل ولا.. يمكن بعد يطوره ويحسنه بحكم أنه من الدماء الجديدة.
خلونا نكون واقعيين، من ووين بجيب الخريج الجديد حتى وإن كانت شهادته من أعرق الجامعات الخبرة، إذا ما عطيناه فرصة للاحتكاك الفعلي ببيئة العمل، عشان يطلع من نطاق التنظير اللي بالكتب إلى نطاق التطبيق العملي؟.
وترى الخريج خاض تدريب عملي خلال فترة دراسته، وعنده شوية خبرة.
كلنا في يوم من الأيام كنا بمكانهم، وبدينا من الصفر عشان نوصل لليوم اللي نقول فيها عدنا خبرة، فاعطوا الشباب فرصة وشيلوا هالشرط اللي يحطم كل احلامهم.
ياسمينة: أعطوا الشباب الفرصة لينالوا الخبرة.
الخميس 21 أبريل 2022 فرحة خريج الجامعة قصيرة كلش، ما يمديه يفرح إلا بعدها يحزن، ويجيه اكتئاب بعد!وبالتحديد لما يبدأ يبحث...
أحدث التعليقات