الثلاثاء 19 أبريل 2022
يمكن ملّينا من المسلسلات الخليجية والعربية اللي تصور لنا خطورة توريث الأبناء في حياة آبائهم، والأضرار اللي يمكن تصيدهم من ورا هذا القرار ونقول: “أف إلى متى هالمشاهد المكررة؟”
بس اليوم، ومع القصص اللي نشوفها ونسمعها أقول: “مو غلط، بالعكس خل هالمشاهد تتكرر وتحذر الناس من هالقرار اللي يمكن يفقدهم عزهم في حياتهم. وهم أصحاب العز كله!
النفس البشرية هي هي ما تغيرت، والشخوص هي بس اللي تتغير… والمال يغري ويعمي بنفس الوقت… مو قسوة لما الآباء يأجلون عملية توزيع ثرواتهم أو أملاكهم، مهما بلغت من ثروة أو قلت إلى ما بعد مماتهم الله يطول بأعمارهم… هم اللي تعبوا وشيقيوا وجمعوا الخير كله. ومن حقهم يعيشون بكرامة وعز إلى آخر يوم بحياتهم.
مو كل أولاد بارين بأهليهم، ومو غريبة بعد ما تتوزع عليهم التركة يرمون أهاليهم بدور العجزة، وإذا ما قطّوهم ما سألوا عنهم بالسنين!
ولازم نتذكر قول الله تعالى: “يا أيها الذين آمنوا إن من أزواجكم وأولادكم عدوًّا لكم فاحذروهم” صدق الله العظيم.
ما تعرف ولدك اللي من صلبك وتعبت وربّيته وأفنيت عليه زهرة شبابك بكون بار فيك أو عدو لك!
خصوصاً إذا عَمَته ملذات الدنيا ونسى أن أهله يمكن قصّروا على نفسهم بس عشان هو يعيش مرتاح… وعشان ما تضربون كف بكف حسرة وندم… لا تورِّثوا أبناءكم في حياتكم.
ياسمينة: اتعظوا من أخطاء الغير، كي تعيشوا بعز وتموتوا بعز.
الثلاثاء 19 أبريل 2022 يمكن ملّينا من المسلسلات الخليجية والعربية اللي تصور لنا خطورة توريث الأبناء في حياة آبائهم، والأ...
أحدث التعليقات